Ikasle Bisitaria aldi batez Deustuko Unibertsitateko edozein ikastegitako ikasketa planetako irakasgaiak jorratuz bere ikasketak zabaldu nahi dituen unibertsitateko ikasle atzerritar edo espainiarra da. Ikasle bisitaria izateko ezinbestekoa izango da unibertsitatean sartzeko baldintzak beteta izatea eta Espainiako edo atzerriko beste Unibertsitate batean matrikulatuta egotea edo egon izana.

Ikasle bisitarien erregimena honako araudiak arautuko du, ikaslearen jatorrizko Unibertsitatearen eta Deustuko Unibertsitatearen arteko hitzarmenik ez badago. Hitzarmenik egonez gero, bertan xedatutakoari emango zaio lehentasuna. Ikasle bisitariek matrikulatuta dauzkaten irakasgaien eskolara joateko eta azterketak eta probak egiteko eskubidea izango dute. Ezin izango dute azterketarik egin Unibertsitatean ikasturte osoan ez daudenek irakasgaia urte osokoa bada, edo seihileko osoan ez daudenek irakasgaia seihilekoa bada.

Ikasle bisitaria izateko eskaria Idazkaritza Orokorrean aurkeztu behar da, eta honek onarpen arrunterako ezarritako epearen barruan tramitatuko du. 

Ondorengo agiriak aurkeztu beharko dira:

• Nortasun agiria.
• Atzerriko edo Espainiako beste Unibertsitate batean matrikulatuta egotearen edo egon izanaren ziurtagiria.
• Egin nahi diren irakasgaietarako eskaria.

Onartuak diren ikasleek ematen zaizkien instrukzioei jarraituz egingo dute matrikula. Honakoa ekarri beharko dute:

• Istripuetako aseguru-poliza eta aseguru medikoa egin izanaren frogagiria, Eskola-aseguruaren gaineko legerian aurreikusten ez diren kasuetan.
• Ezin izango dira 60 ECTS kreditu baino gehiago matrikulatu.

Era honetara ikasketak eginda ezin da Deustuko Unibertsitateko titulurik eskuratu. Ikastaroaren amaieran, Aprobetxamenduko Ziurtagiria luzatuko da, egindako kreditu kopurua eta lortutako kalifikazioa agertuko direlarik, matrikulatutako irakasgaiari dagozkion azterketak edo probak eginez gero. Idazkaritza Orokorrak egindako irakasgaien eta lortutako kalifikazioen ziurtagiria bidaliko du jatorrizko Unibertsitatera, ikasleak hala eskatuta.